Nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; damus et concedimus vobis judici, justicia, juratis et concilio Turolii, totam custodiam salis salinarum nostrarum de Archubus omnium locorum infrascriptorum, videlicet ville et aldearum Turolii, castri et ville de Alfambra et totius baiulie eiusdem, de Alcalano et totius baiulie eiusdem, de Alcalano et totius baiulie eiusdem, de Vilello et totius baiulie eiusdem, de Castiel et de Adamuz et omnium aliorum locorum que consueverunt et debent uti et accipere de dicto sale.

Ita quod vos ponatis et substituatis et ponere seu substituere possitis, illum quem vos volueritis et loco vestri in custodiam dicti salis, et ille custos habeat et percipiat quolibet anno in dictis salinis trescentos solidos jaccensis pro suo officio et labore.

Est tamen sciendum quod homines aldearum Turolii debent emere et recipere de dicto sale quolibet anno ad opus sui et ganatorum suorum mille caficia a festo sancti Johannis Babtiste usque ad festum sancti Martini.

Et sic volumus quod vos habeatis, teneatis et possideatis de cetero dictam custodiam salis et dictus substitutus a vobis habeat et percipiat inde dictos trescentos solidos quolibet anno in dictis salinis, ut est dictum, dum tamen bene et fideliter se habebit in custodia dicti salis.

Est tamen sciendum quod propter hoc non intelligimus revocare cartam a nobis factam comendatori de Aliaga, super facto salis ut in ea continetur.

Datum Calataiubii VIIIº idus febroarii anno Domini millesimo CCº LXº nono.