Noverint universi quod nos Jacobus, Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et omnes nostros damus et concedimus per hereditatem propriam, francam et liberam vobis, venerabili et dilecto nostro B. Dei gratia episcopo Vicensis et episcopis vestris successoribus in perpetuum, domos in Valentia que fuerunt de raiç Abuazmen, cum duabus domibus ad opus stabuli, que se tenent cum illis ex parte occidentali, et cum alia domo que est ante portam earundem domorum versus viam publicam, per quam itur ad portam turris majoris, que modo est fratrum militie Templi.

Et damus vobis hortum de Maomat Abenarap, ad habendum, tenendum, possidendum, expletandum, cum introitibus, exitibus, affrontationibus, et suis pertinentiis universis a celo in abissum, ad dandum, vendendum, impignorandum, alienandum, et ad omnes vestras vestrorumque voluntates cuicumque volueritis faciendas.

Datum Valentie quarto idus decembris era M. CC LXX sexta.

Sig+num Jacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Huius rei testes sunt: F. infans Aragonum, P. dominus Maioricarum, P. Ferrandiç de Azagra, Eximenus de Urrea, A. de Luna.

Sig+num Guillemoni Scribe, qui mandato domini Regis, pro domino [Berengario], barchinonensi episcopo cancellario suo, hoc scripsit.