Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros donamus et concedimus et stabilimus in perpetuum vobis, R. de Solmons, P. Arnaldi, A. Guillermi, Bover, R. de Besturç et Ferrario de Sancta Fide, et aliis sociis de Tremp qui populaverint et habitaverint ibi, viginti domos sive albergos in turre de Montecateno que est in termino de Valencia.

Quas domos sive albergos, cum illis ortis qui se tenuerint cum eisdem domibus, habeatis semper vos et vestri franchas et liberas.

Et damus vobis et vestris viginti iovatas terre in termino eiusdem turris, de quibus dabitis nobis et nostros vos et vestri, quartam partem de omnibus fructibus et expletis que Deus ibi dederit fideliter.

De illis scilicet terris que fuerint in rigadivo, et de illis terris que fuerint in secano, dabitis quintam partem de blado intus aream tracturatum et vindemiam intus vineam vindemiatam.

Et hec sine missione nostra aliqua et nostrorum.

Et sic ab hac die in antea dictas domos et ortos et dictas viginti iovatas terre habeatis semper sub dictis conditionibus, ad habendum, tenendum, possidendum et expletandum, cum introitibus, exitibus, et affrontationibus et suis pertinenciis universis a celo in abissum, ad dandum, vendendum, impignorandum, alienandum, et ad omnes vestras vestrorumque voluntates perpetuo faciendas, exceptis militibus et sanctis.

Datum Valencie XV kalendas septembris anno Domini millesimo CC quadragesimo.

Huius rei testes sunt: [1ª col.] Ferrarius, infans Aragonum, [2ª col.] Eximini de Urrea, Petrus Ferrandi de Albarraçin, [3ª col.] Eximini de Luna, Eximini Petri, repositarius regni Valencie.

Sig+num Guillermi Scribe, qui mandato domini Regis pro domino Berengario, barchinonensi episcopo cancellario suo, hanc cartam scripsit loco die et anno prefixis.

Lecta fuit Regi.