Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros damus et concedimus venerabili et dilecto fratri Berengario, abbati et conventui monasterii Populeti et per vos universis hominibus vestris de Verduno et aliis hominibus vestris presentibus et futuris, quod racione vel occasione alicuius debiti sive contractus querele seu maleficii vel forfacti, non teneamini vos vel vestri homines supradicti de cetero litigare seu placitare, neque firmare directum in posse alicuius vicarii vel subvicarii de Tarrega, nec in posse alicuius officialis eiusdem loci, nec possint vos vel vestros homines ad hoc faciendum compellere nec pignorare nec aliquo modo distringere.

Set mandamus et statuimus quod in posse vicarii nostri de Cervaria, teneamini vos et homines supradicti super premissis omnibus et singulis firmare directum, et litigare sub examine ipsius et facere et complere cuilibet vel quibuslibet de vobis vel hominibus vestris predictis querimoniam proponentibus vel habentibus iusticie complementum.

Mandamus itaque vicariis subvicariis, baiulis, curiis et aliis officialibus de Tarrega, presentibus et futuris, quatenus contra predictam donacionem seu concessionem quam vobis et vestris hominibus facimus non veniant nec aliquem venire permitant, immo omnia supradicta et singula volumus quod observent et faciant ab omnibus inviolabiliter observari.

Datum apud Vicum VIII idus septembris anno Domini Mº CCº Lº tercio.