Noverint universi quod nos, Jacobus, Dei gratia rex Aragonum, Maioricarum et Valencie, comesque Barchinone et Urgelli et dominus Montispesulani; attento servicio quod vos aliama judeorum fecistis nobis de octo mille solidis regalium Valencie, in guerra quam cum sarracenis habuerimus; volentes ac etiam cupientes facere remuneracionem aliquam de servicio memorato; idcirco per nos et nostros damus et concedimus vobis aljame predicte et vestris imperpetuum, carniceriam judarie nunc Valencie, cum omnibus iuribus que nos in ipsa haberemus vel modo aliquo habere seu percipere debemus.

Concedentes vobis quod dictam carniceriam facere et construere possitis in loco vel locis illis in quo vel quibus vobis magis placuerit judarie.

Et possitis in ea facere tendas et tabulas quot volueritis ad tallandum et vendendum carnes sine omni nostro et nostrorum impedimento et contradiccione, ac etiam omnium aliarum personarum.

Et sic volumus quod habeatis, teneatis et possideatis de cetero dictam carniceriam francham et liberam, cum omnibus supradictis, prout melius dici vel intelligi potest, ad vestrum et vestrorum bonum et sincerum intellectum.

Mandantes tenenti locum nostrum in regno Valencie, necnon baiulo, justicie, ac universis aliis officialibus nostris Valencie, presentibus et futuris, quod hanc donacionem quam de dicta carniceria vobis facimus, firma habeant et observent et faciant ab omnibus inviolabiliter observari, et non contraveniant nec aliquem contravenire permittan imquam aliquo tempore, aliquo modo, seu aliqua racione, si de nostra confidunt gracia vel amore.

Datum in Tamarito, idus julii anno Domini Mº CCº sexagesimo quinto.