Manifestum sit omnibus, quod nos Jacobus, Dei gratia rex Aragonum et regni Maioricarum, comes Barchinone, Urgelli ac dominus Montispesulani; attendentes multa servicia que vos, dilectus noster dompnus Eximinus d'Urrera nobis multipliciter fecistis, facitis tota die, cum presenti scripto nostro firmiter et perpetuo valituro, donamus, concedimus et laudamus vobis et vestris castrum quod vocatur Alcalaten cum suis alquereis, et cum casis, campis, et terris cultis et incultis, et aquis et erbis, agnis [sic], arboribus, montibus et terminis, ingressibus et egressibus suis, et cum melioramentis factis et faciendis, et cum omnibus omnino et singulis iuribus et pertinenciis que ad ipsius castrum pertinent et debent modo aliquo pertinere, totum integre et sine omni retentu, de celo usque ad abissum, ut teneatis et possideatis eum vos et vestri, pacifice et quiete, ad dandum, vendendum, impignorandum, comutandum, et quocumque modo volueritis alienandum et faciendum omnes vestras vestrorumque proprias inperpetuum voluntates, sicut melius et utilius dici, nominari, et intelligi potest, ad vestrum vestrorum bonum intellectum et comunem utilitatem.

Mandantes maioris domis, senyoribus, militibus, populis et nostris subditis universis, ut hanc donacionem nostram firmam habeant et observent, et faciant ab omnibus et ubique firmiter observari, et non contraveniant si de nostri confidant gracia et amore.

Datum in Borriana, VIIII kalendas augusti anno Domini Mº CCº XXXIIIº.

Signum + Jacobi, Dei gratia regis Aragonum et regni Maioricarum, comitis Barchinone et Urgelli et domini Montispesulani.

Testes huius rei sunt: F. infans Aragonum, B. de Alagone maiordomus Aragonum, P. [sic] de Liçana, P. Corneli, Blascus Maça, Vall[esius] de Verga, Asalitus de Guadal, Marchus Ferrien, G. de Sese, Ferrandus Didaci maiordomus curie, P. Petri justicia Aragonum.

Sig+num Petri Johannis, scriptoris, qui mandato domini regis hoc scripsit, loco, die, et anno prefixis.