Noverint universi quod nos, frater Luppus Martinez, comendator de Alcaniç et de omnibus domibus et hereditatibus quibus ordo Calatrave viget in regno Aragonie et Valentie, et ego frater Garcias, comendator domus de Borriana, et ego frater Ferrer, prior de Bugarra, et ego frater Blascho Petriç, et ego frater Montaner, nos omnes predicti fratres ordinis de Calatrava, per nos et per totum conventum eiusdem ordinis, ad comunem utilitatem totius conventus eiusdem, intendentes et ad memoriam reducentes devotionem et benivolentiam quam vos, Johannes de Brusca et universi populatores de loco qui dicitur Albocacer, in termino de illis Covis de Avinromano, erga ordinem nostrum habetis; ideoque, cum pleno sensu et memoria, non seducti ab aliquo neque coacti, sed gratis et sponte, damus, concedimus, laudamus et confirmamus cum hoc publico instrumento perpetuo valituro, vobis dicto Johanni de Brusca, et universis populatoribus et habitatoribus, presentibus et futuris, locum illum qui dicitur Albucacer, in termino de illis Covis de Avinromano, cum montibus et silvis, et fontibus, et paschuis, et heremis et populatis, ad bonum forum et consuetudinem Cesarauguste, sicut vobis melius, plenius, datum fuit firmiter et assignatum quondam a dompno Blasco de Alagone.

Statuentes firmiter et confirmantes, ut ea omnia integre sine diminutione aliqua et sine malo usatico et censu, et absque aliquo servitio sive consuetudine, statuta vel statuenda, habeatis, possideatis, explectetis, ad dandum, vendendum, impignorandum, alienandum, et ad omnes vestras vestrorumque voluntates libere faciendas, sicut melius vel plenius potest vel legi, aut intelligi poterunt, ad vestrum et vestrorum comodum et salvamentum, in instrumentis donationis a dompno Blascho de alagone vobis confecto, ad bonum forum Cesarauguste et consuetudinem, sicut superius est expressum.

Retinemus preterea, quod vos nec filii nec successores vestri dictum locum, nec aliquid hereditatum immobilium non possitis vendere, impignorare, sive alienare alio ordini nisi nostro, tamen neque militi sive infanoni.

Et ut presens confirmatio plenius robur obtineat firmitatis, recipimus vos et vestros sub fide Dei et legalitate, et sub virtute ordinis nostri, quod nos nec nostri presentes sive futuri de cetero in aliquo non valeamus revocari, hoc publicum instrumentum nostro sigillo fecimus roborari.

Quod est actum Valentie, IXº kalendas febroarii, anno Domini Mº CCº XL IIº.

Sig+num fratris Luppi Martinez. Sig+num fratris Garsie, comendatoris. Sig+num fratris Ferrari, prioris. Sig+num fratris Blasco Petriç. Sig+num fratris Montaner, nos qui hec per nos et totum conventum de Calatrava laudamus, concedimus et firmamus.

Actum est hoc in presentia Petri, sacerdotis ecclesie Sancti Michaelis de Valentie.

Sig+num Martiniç Roi de Moya, militis. Sig+num Iohannis de Stada. Sig+num Marquesii de Plaença, testium ad hec rogatorum.

Sig+num Guillermi de Jacca, publici notarii Valentie, qui mandato dictorum fratrum de Calatrava hoc scripsit.