Noverint universi, quod nos, Jacobus, Dei gratia rex Aragonum, Maioricarum et Valentie, comes barchinone et Urgelli et dominus Montispesulani, per nos et nostros donamus et concedimus per hereditatem propriam, francham et liberam, vobis Arnaldo de Cardona, Raymundo de Manso, Bernardo de Olivella, Arnaldo Vinader, Arnaldo Punyet, Vitali de Saldos, Raymundo Fresquet, Arnaldo de Corel, Johanni Aragonensii, Francisco d'En Jacme, Petro Ripolls, Messeguerio, Petro Rosia, Guillermo de Lorach, Guillermo de Podio Benedicto, Petro Narbo, Arnaldo Cap de Ferre, et omnibus aliis populatoribus et habitatoribus Peniscole, et vestris, imperpetuum, omnes domos que date et asignate sunt vobis per Guillermum de Vico, divisorem Paniscole; et omnes hereditates et ortos qui dati et asignati sunt vobis per dictum Guillermum in termino Peniscole.

Que domus, hereditates, et orti, erant serracenorum Peniscole, tempore quo serracenos expulimus a regno Valentie.

Predictas itaque domos, hereditates et ortos, habeatis cum introitibus, exitibus, affrontationibus, et suis pertinentiis universis, a celo in habissum, ad omnes voluntates vestras et vestrorum, cuicumque volueritis perpetuo faciendas, exceptis militibus et personis religiosis.

Et faciemus vobis ad bonum intellectum, secundum quod omnibus civitatis Valencie faciemus.

Nos itaque omnes populatores supradicti, iuramus per Deum et eius sancta quatuor evangelia, quod aliqua predictorum hinc ad decem annos non vendamus, et hinc ad unum annum omnes possessiones quas alibi habemus vendamus, et in Peniscola personalem residentiam faciamus.

Datum Morelle Vº kalendas febroarii anno a Nativitate Domini millesimo CCº quinquagesimo.

Sig+num Jacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt Guillermus de Angularia, Eximinus Petri de Arenoso, Petrus Corneli, Petrus de Cillis, Berengarius de Tamarit.