Logo UJI
ARXIU VIRTUAL JAUME I
Documents d'època medieval relatius a la Corona d'Aragó
1218, setembre 5. Lleida
Jaume I confirma la moneda jaquesa atorgada pel seu pare i atorga mesures per a la seua protecció durant la sessió de corts celebrada a la ciutat de Lleida per a aragonesos i catalans
Arxiu Municipal de Zaragoza. Privilegis reials, nº R-15. Pergamí original
[CANELLAS, nº 48]. Nova transcripció efectuada el 18-X-2007, a partir del manuscrit de referència

In nomine Domini.
Quecumque a regibus et principibus statuuntur in sua debent soliditate consistere, et ne processu temporis oblivioni tradantur, scripture debent memoria commendari.
Hac igitur consideratione inducti, nos Jacobus, Dei gratia rex Aragonum, comes Barchinone, et dominus Montispesulani, habito consilio et deliberatione comuni cum venerabilibus patribus nostris, S. Dei gratia terraconensis archiepiscopo, Berengario ylerdensi, S. cesaraugustano, et Poncio dertusensi episcopis, fratre G. Artiga magistro Emposte, et fratre Poncio menescalco, tenente locum magistri milicie in partibus Ispanie, necnon dompno comite Sancio magno patruo nostro, et dompno Ferdinando patruo nostro karissimo, preterea G. de Montecatano, A. vicecomite Castriboni, Eximino Cornelii, P. Fernandi sancte Marie, P. Aoenense, Roderico Lizana, Artallo de Luna et G. de Cervaria, consiliariorum nostrorum, et aliis magnatibus, baronibus et nobilibus terre nostre, videlicet R. de Cervaria, R. Galcerandi, Hugone de Mataplana, B. de Portella, Loferrenco de Luna, P. Arces de Aguilar, Aoreilla, Atone de Focibus, et Valesio, ac generaliter cum tota curia nostra Catalonie et Aragonis apud Ylerdam congregata, nos et ipsi omnes pariter, attendentes quod secundum statum in quo est hoc tempore terra nostra utilius est nobis et toti regno nostro ut moneta iaccensis, que tempore gloriose memorie domni Petri patris nostri ultimo facta fuit, debeat confirmari et in suo robore permanere pocius quam mutari, statuimus et sancimus ut predicta moneta ab hac die in antea usque ad instans festum beati Michaeli, et ab eadem festo usque ad decennium continue completum, communiter accipiatur ab omnibus et ubique ubi et a quibus secundum statuta predecessorum nostrorum accipi solet, atque usque ad finem prefati temporis inviolabiliter et irrefragabiliter in suo valore consistat.
Convenimus preterea de communi consilio et assensu omnium predictorum, omni dolo et verborum cavillatione submotis, quod usque ad finem temporis supradicti neque in regno nostro nec alibi faciemus aut fieri permittemus illius figure, cuius est moneta supradicta, vel alterius, cudi aut fabricari monetam; sed illa sola iaccensi moneta contentus sit totus populus terre nostre que fabricata fuit ultimo tempore recordationis inclite patris nostri et que modo currit publice.
Adhuc de consilio comuni et expressa voluntate omnium predictorum et etiam populorum quorumlibet terre nostre irrefragibili constitutione sancimus ut, si qua persona quantumlibet ingenua vel alia persona quelibet nostre iurisdictioni subiecta, inventa fuerit vel convicta istius valoris vel alterius iaccensis figure etiam auctoritate nostra, quod absit, cudere vel fabricare monetam, omnia bona ipsius mobilia et inmobilia confiscentur; et ipse vel ipsi tanquam proditores ad forum Aragonis, et perfidi ad forum Catalonie, et hostes publici regni nostri, de toto regno nostro si ingenuus vel ingenui fuerint expellantur et exponantur atque subiaceant persecutioni omnium subiectorum nostrorum; et si forte illam personam vel illas personas ex predicta persecutione interfici vel ledi quomodocumque contigerit, illius mortis vel lesionis nulla ultio in posterum ab aliquo requiratur vel fiat, sed interfectores illi et lesores tuti permaneant, et nostra contra omnes firma et perpetua proteccione muniri, modo aliqua persona fuerit, tanquam falsarius puniatur.
Quod si forte aliquis consiliariorum nostrorum vel omnes suis persuasionibus nos vellent inducere aut fortassis quod absit inducerent, quoquomodo ut Dei timore ac regio honore postpositis contra statuta superius posita veniremus, volumus et spontanei consentimus ut venerabilis pater noster terrachonensis archiepiscopus, tam nos quam consiliarios nostros, per excomunicationem personarum et regni interdictum a predicta illicita presumptione compescat, et preterea omnes populi nostre iurisictioni subiecti circa susceptionem illius monete que contra statuta supradicta cuderetur, ab obedientia nostra sint penitus absoluti.
Volumus et mandamus quod ex X usque XX homines de adenantatis singularum civitatum supra anima eorum et convicinorum suorum iurent quod predicta nobis auxilientur servare, et faciant tenere firmiter quantum in eas fuerit.
Ad maiorem autem omnium predictorum firmitatem, nos Jacobus, Dei miseratione rex aragonensis, comes barchinonensis et domnus Montispesulani, tactis corporaliter et libere sanctis quatuor Evangeliis et Cruce, iuramus quod omnia supradicta et singula firmiter et inviolabiliter observabimus et faciemus ab omnibus nostre iurisdictionis subiectis sicut superius expressa sunt, firmiter et inviolabiliter observari.
Et nos Sancius, Dei gratia terrachonensis archiepiscopus, promittimus bona fide cquod cum episcopis sufraganeis nostris, quantum in nobis fuerit et poterimus, faciemus universa predicta et singula firmiter observari. Et nos predicti consiliarii et barones libenter, tactis corporaliter sanctis quatuor Evangelia et Cruce, iuramus quod quantum in nobis fuerit et poterimus, predicta omnia et singula firmiter observabimus et faciemus inviolabiliter observari.
Data Ilerda, nonas septembris anno Domini Mº CCº octavo decimo.
Sig+num Jacobi, Dei gratia regis aragonensis, comitis Barchinone et domni Montispessulani, jurati.
Sig+num fratris Garcie Artiga magistri Emposte. Sig+num Ferrandi iurati. Sig+num Guillelmi de Montecatano iurati. Sig+num Petri Ferrandi sancte Marie iurati. Sig+num G. de Cervaria iurati. Sig+num fratris Poncii Menescalci, tenentis locum magistri domus Templi. Sig+num Arnaldi de Castrobon iurati. Sig+num Roderici Lizana iurati. Sig+num R. Gauzerandi iurati. Sig+num Hugonis de Mataplana iurati.
Testes huius rei sunt suprascripti omnes et multi alii et generaliter tota curia nostra.
Sig+num Arnaldi Boneti, qui hoc scripsit.
AB CD EF GH

Universitat Jaume I. Castelló. Arxiu Virtual Jaume I - http://www.jaumeprimer.uji.es - Document nº 000784

© 2006 - Universitat Jaume I - Arxiu virtual Jaume I