Noverint universi, quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros concedimus vobis concilio ville et aldearum Morelle presentibus et futuris, et statuimus quod nos nec baiulus nostri Morelle nec alia persona pro nobis, nunc aliquis homo ville vel aldearum Morelle aut alterius cuiuslibet loci nec aliquis etiam miles, clericus vel religiosus, non faciet vel audeat vel possit facere de cetero furnum pegunte in aliquo loco termini Morelle, nec in toto termino Morelle scindere pinus et portare extra dictum terminum ad faciendum pegunta. Ita quod hoc observetur dum utilitas fuerit dicte ville et nobis placuerit.

Item, per nos et nostros concedimus vobis et vestris atque statuymus imperpetuum, quod aliquis homo extraneus que non sint vicinus Morelle non possit nec audeat in termino Morelle facere talium fuste nec extrahere inde fustam, nisi homines Morelle et aldearum suarum tantum.

Et quicumque contra hoc venire temptaverit, penam LX solidos incurrat, quocumque et quocienscumque quis hoc duxerit atemptandum; et nichilominus fustam admitat. De que pena nos habeamus duas partes et custos nemoris terciam partem.

Mandantes firmiter baiulis, justicie, alcaydi et universis aliis officialibus et subditis nostris et cetera.

Datum Exee III idus marcii anno Domini Mº CCº LXXº primo.

Sig+num Jacobi [Dei gratia] regis Aragonie, Maioricarum et Valencie, comitis Barchinone et Urgelli et domini Montispesulani.

Testes sunt: G. R. de Moncada. Berengario A. de Angularia. Eximenus de Urrea. Periconus de Moncada. Ferrerius de Liçana.

Sig+num Simonii de Sancto Felicio, qui mandato domini Regis predicti hec scribi fecit et clausit, loco die et anno prefixis.