Jacobus, Dei gratia rex Aragonum Maioricarum et Valencie, comes Barchinone et Urgelli et dominus Montispesulani.

Nobilibus, dilectis et fidelibus suis universis richis hominibus, militibus, vicariis, baiulis, merinis, suprajunctariis, justiciis et universis aliis officialibus et subditis nostris, ad quos presentes pervenerint. Salutem et dilectionem.

Noveritis nos intrasse personaliter in Vallem de Aran, et homines eiusdem Vallis receperunt nos cum magna reverentia et honore, tanquam naturalem dominum eorundem, et obedierunt nobis in omnibus ut boni vassalli debent suo domino obedire.

Unde cum nos de ipsis, tanquam de fidelibus et bonis hominibus nostris paccati simus, et eos in suo iure defendere teneamur et securos per omnia loca terre et jurisdictionis nostre tenere, dicimus et mandamus vobis, firmiter et districte, quatenus eosdem homines Vallis de Aran, cum omnibus bestiis et mercibus ac rebus eorum, permittatis ire et redire per omnia loca terre jurisdictionis nostre, et stare ibidem salve pariter et secure, tam in heremo quam in populato, et eos vel bona eorum non invadatis, capiatis, impediatis, detineatis, marchetis, offendatis seu etiam pignoretis, culpa, crimine seu debito alieno, nisi ipsi debitores vel fideiussores fuerint manifesti; nec in hiis etiam casibus nisi prius in eis fatica inventa fuerit de directo.

Nos enim, eos homines dicte Vallis, presentes et futuros, tanquam homines nostros proprios, cum omnibus bonis eorum, sub nostra constituimus comenda et guidatico speciali.

Quicumque autem contra hoc mandatum nostrum venire attemptaverit, iram et indignationem nostram et penam mille morabatinorum se noverit incursurum, dampno eis illato primitus restituto. Et nos nichilominus procederemus contra ipsum tanquam adversus illum qui nostros proprios homines deprimeret. Si qui vero querimoniam habuerint de predictis hominibus vel aliquo eorum, compareat coram nobis, et nos faciemus in posse nostro vel alicuius hominis nostri fieri querelantibus ab eisdem iustitie complementum.

Datum in Valle de Aran, Xº kalendas augusti anno Domini Mº CCº LXº quinto.