Logo UJI
ARXIU VIRTUAL JAUME I
Documents d'època medieval relatius a la Corona d'Aragó
1299, novembre 17. Perpinyà
Jaume II de Mallorca prohibeix l'entrada de ví foraster als comtats de Rosselló, Vallespir i Conflent, en benefici del ví que es produeix a Perpinyà
Arxiu Municipal de Perpinyà. Llibre Verd, ff. 80v-81r. Còpia de finals del segle XIV

Noverint universi, quod nos Iacobus Dei gratia rex Maioricarum, comes Rossilionis et Ceritanie et dominus Montispesulani, volentes utilitati habitatorum ville Perpiniani providere, ad multam instanciam et supplicationem consulum et proborum hominum dicte ville, per nos et nostros concedimus dictis consulibus et probis hominibus ac universitati dicte ville presentibus et futuris in perpetuum, quod de cetero nullus extraneus vel privatus audeat immittere in terram Rossilionis Vallispirii et Confluentis vinum extraneum quod non sit de dictis terris, per terram scilicet nec per mare.
Item, concedimus et statuimus perpetuo quod nullus extraneus vel privatus audeat immittere nec vendere in villa Perpiniani nec circumcirca dictam villam, a castro scilicet de Verneto et a villis de Malleolis et de Baiolis et de manso de Garriga domus Templi citra, vinum extraneum quod non sit factum infra dictam villam Perpiniani, sed de castris et aliis locis terre Rossilionis et Vallispirii possint quicunque voluerint aportare vindemiam et racemos ad vendendum ad dictam villam Perpiniani.
Volentes et statuentes quod quicunque contra dicta statuta in aliquo fecerit aut venerit, amittat vinum quod aportaret seu venderet in dicta villa Perpiniani vel infra dictos terminos superius confrontatos. De quo vino accusator seu denunciator habeat terciam partem integriter, et curia nostra habeat residuas duas partes.
Recognoscimus etiam dictis consulibus et probis hominibus quod ipsi ex causa concessionem predictarum ac statuti satisfecerunt nobis in redditibus quindecim librarum malgurienses annualium, pro emenda et reconpensatione iuris botagii quod percipiebamus de omni vino extraneo quod immittebatur in dictam villam Perpiniani. Et de dicta satisfactione nos pro paccatos et contentos tenemus et inde nobis satisfactum fuisse de dicto iure dicti botagii plenarie reputamus.
Mandantes vicariis baiulis et universis aliis officialibus nostris presentibus et futuris, quod predictas concessiones nostras et statutum firmas habeant et observent et non contraveniant nec aliquem contravenire permittant aliqua racione.
Et ad maiorem firmitatem et in testimonium predictorum presens instrumentum sigillo nostro pendenti iussimus comuniri.
Datum Perpiniani quintodecimo kalendas decembris anno Domini millesimo ducentesimo nonagesimo nono.
Signum + Iacobi, Dei gratia regis Maioricarum, comitis Rossilionis et Ceritanie et domini Montispesulani.
Testes sunt: Arnaldus de Saga, Raymundus de Caneto villarius miles, Iacobus de Muredine, Bernardus Dalmacii et Arnaldus Baiuli, iudices dicti domini regis.
Sig+num Petri de Calidis qui mandato dicti domini regis hec scribi fecit et clausit loco die et anno prefixis.

Universitat Jaume I. Castelló. Arxiu Virtual Jaume I - http://www.jaumeprimer.uji.es - Document nº 001283

© 2006 - Universitat Jaume I - Arxiu virtual Jaume I