Noverint universi, quod nos Iacobus Dei gratia rex Maioricarum, comes Rossilionis et Ceritanie et dominus Montispesulani; subditorum nostrorum indempnitatis intendentes libenter restringendo, ea per que nostri officiales moderni et qui pro tempore fuerint, possint ipsis nostris subditis inferre gravamen et dampnum iniuste et ampliantes ea per que iidem nostri subditi ab iniustis molestiis ervantur; ad humilem supplicationem consulum et proborum hominum ville Perpiniani quam ex iusticia et gratia duximus exaudiandam universitati dicte ville et singulis ex ea, ex certa sciencia damus et concedimus, volumus, ordinamus et perpetua constitutione sanccimus quod quandocunque et quoscienscunque aliquis fuerit delatus vel accusatus de aliquo crimine in curia baiuli Perpiniani, et pro ipso crimine oporteat ipsum firmare in posse eiusdem curie; si crimen de quo fuerit delatus vel accusatus sit tale quod non requirat penam mortis vel membri mutilationem, vel aliam penam corporalem, fideiussores qui fideiubebunt non teneantur fideiubere de ipso personaliter representando, sed solum de iudicato solvendo, nisi persona delati vel accusati esset necessaria in inquisitione facienda de ipso crimine.

Item, si aliquis fideiusserit pro aliquo representando in dicta curia sub certa pena quod elapsis duobus annis a die dicte fideiussionis facte, si dicta curia requirat dicum fideiussorem quod representet illum pro quo fideiusserit, non teneatur eum representare dum tamen se offerat deffensioni illius pro quo fideiusserit, quantum ad crimen seu causam pro quo vel qua fideiusserit tantum, quamvis forma fideiussionis recepte seu obligatio eiusdem extenderet se ultra biennium, nisi nobis videretur quod esset racionabile et iustum ipsum fore representandum.

Item, quod quocienscunque sagiones Perpiniani pignorabunt aliquem hominem de Perpiniano pro aliquo banno vel debito quod ipsum pignus habeat tradere alicui vicino ipsius pignorati, qui teneat ipsum pignus per manum curie, tam diu donec pignoratus satisffecerit de eo et pro quo fuerit pignoratus, nisi ipsum pignus esset tradendum creditori pignorati vel alias preconi publico pro ipso vendendo iuxta consuetudinem Perpiniani.

Item, quod nullus officialis noster aut successorum nostrorum audeat tenere per se vel alium bestiare minutum infra terminos ville Perpiniani, aut infra terminos de Malleolis, de Verneto, de Tayveriis, de Apiano, de Capite Stagno et de Baiolis, nec emere aliquos redditus comunis ville ut cisiani et similes, neque furnos neque mensuraticum.

Item, quod homines Perpiniani habentes possessiones in villis et castris et locis terre nostre, extra villam Perpiniani, possint tenere in predictis villis et castris et locis ubi habebunt et habent dictas possessiones bestiare minutum et grossum, ad voluntate eorum sine prestacione pascherii, dum modo non sit detrenuta nec fiat infraudem. Non obstante quadam ordinatione seu statuto in contrarium olim facto, quod ex certa sciencia revocamus, cassamus et anullamus. Verumptamen si aliquis de predictis vellet tenere dicta sua animalia de nocte in aliqua de possessionibus suis, sub clausura de parrech causa stercorandi dictam suam possessionem, quod sit ei licitum facere ad voluntatem suam et sine prestatione pascherii.

Mandamus itaque locum nostrum tenentibus, vicariis, baiulis, ac aliis officialibus nostris presentibus et futuris, quod ordinacionem et constitutionem nostram huiusmodi firmam habeant et observent et faciant ab omnibus firmiter ac inviolabiliter observari.

In quorum omnium premissorum fidem et testimonium presentem cartam nostro sigillo pendenti iussimus comuniri.

Quod est actum in Cauquolibero nonas novembris anno Domini millesimo trecentesimo nono.

Ego Laurencius Plasensa, scriptor preffati domini nostri regis, ipsius mandato hanc cartam scribi feci et clausi, et subsignavi meo publico et solito sig+no.