In Christi nomine.

Manifestum sit omnibus quod nos Iacobus, Dei gracia rex Aragonum, comes Barchinone et dominus Montispesulani, antecessorum nostrorum sequi vestigia cupientes, qui sibi sepulturam in monasteriis ab ipsis edificatis et conditis elegerunt dum in perspicua sumus memoria constituti, eligimus nobis sepulturam in monasterio de Sexena, promittentes Domino Deo et Beate Virgini Marie et vobis, venerabilibus dompne Sancie de Urreya, priorisse, ac toti conventui monasterii de Sexena, bona fide et tactis sacrosanctis Dei evangeliis, quod in obitu nostro corpus nostrum faciamus in vestro monasterio sepeliri. Promittentes firmiter alibi numquam nobis eligere sepulturam et hoc propositum habere irrevocabile atque firmum.

Immo si quid hucusque super huiusmodi promissum fecimus, sano ducti consilio, mente compoti et sano corpore revocamus et vires aliquas decernimus non habere, addentes quod si quam cartam amodo de hoc forte mutando alicuius dileccione vel instancia vel prece fecerimus, nullas vires habere debeat et per istam sic in perpetuum valituram posteriori ex toto debeat denegari.

Datum Ilerde, tercio nonas aprilis era M. CC. LX. IIII, anno Domini M. CC. XXVI.

Signum + Iacobi, Dei gracia regis Aragonum, comitis Barchinone et domini Montispesulani.

Huius rei testes sunt: P. Ferrandi de Albarracino. Rodericus de Lizana. Bernardus Guillelmi. Lupus Ferrench de Luna. Frater Iohannes, prior. Frater Petrus, preceptor. Frater Petrus Garona, subpreceptor. Petrus Sancii, capellanus priorisse, et multi alii. Dompna Sanza de Urreya, priorissa Sexene. Marquisia de Maza, subpriorissa. Milia, sachristana. Guillelma, cantora. Urraca, cameraria.

Sig+num Bertrandi de Villanova, qui mandato domini regis et Gomicii de Almoqueri, notarii sui, hoc scripsit loco, die, era et anno prefixis.