Manifestum sit omnibus quod nos Iacobus, Dei gracia rex Aragonum et regni Maioricarum, comes Barchinone et dominus Montispesulani, attendentes quod monasterium venerabile de Sexena teneamur diligere et in suis iuribus confovere et eciam in bonis omnibus ampliare, cum presenti carta, per nos et successores ac heredes nostros concedimus, laudamus et ex certa sciencia consulte et liberaliter confirmamus vobis, dilecte nostre dompne Sancie, dicti monasterii priori, et toti conventui eiusdem, presenti scilicet et futuro, empcionem illam quam fecistis de Burgelaroz, ita quod dictum locum, cum terminis et pertinenciis eiusdem, sicut dominus Petrus, illustris quondam rex Aragonum pater noster, concesit et assignavit fratribus S[ancti] Georgii cum suo publico instrumento et sicut in carta empcionis vestre a dictis fratribus plenius continetur, habeatis perpetuo, teneatis et possideatis francum et liberum, pacifice et in pace.

Mandantes senioribus, maioribusdomus, repositariis, merinis, zavalmedinis, iusticiis et iuratis et aliis nostris subditis universis, tam presentibus quam futuris, quod hanc nostram confirmacionem firmam semper habeant et observent et non contraveniant in aliquo si confidant de nostri gracia vel amore, et quod dictum locum de Burgelaroz et homines et res eiusdem manuteneant contra omnes homines tanquam nostra propria et non permitant ibi fieri aliquod disturbium vel gravamen, dum vos et conventus parati fueritis sub vestro iudice cuilibet facere iusticiam conquerenti.

Datum apud Maioricas, XI kalendas iunii anno Domini millesimo CC. tricesimo.

Signum + Iacobi, Dei gracia regis Aragonum et regni Maioricarum, comitis Barchinone et domini Montispesulani.

Huius rei testes sunt: Eximinus de Urrea. Dompnus Ladro. Ferrandus Periz de Pina. Assalitus de Gual. Sancius de Vallibus. F. de Sancto Martino. Raimundus de Clusa. Amatus de Garosa.

Sig+num Guillelmi Scribe, qui mandato domini regis pro Guillelmo de Sala, notario suo, hanc cartam scripsit loco, die et anno prefixis.