Iacobus, Dei gracia rex Aragonum et regni Maioricarum, comes Barchinone et

dominus Montispesulani,

Fidelibus suis concilio epilense et hominibus de rivo de Xalon et de rivo de Maria et aliis universis habitatoribus citra Yberum, de Epila usque ad Alcanizium. Salutem et graciam.

Ex parte fidelium nostrorum cesaraugustanorum et aliarum istarum partium recipimus querimoniam continentem quod vestra auctoritate facitis et fecitis vetatos per terminos nostrarum villarum que sunt superius compreense, et vetatis ne ganata Cesarauguste nec aliorum hominum regni nostri pascant ibi nec herbas habeant, neque aquas.

Unde cum ista non pertineant ad vos facere ullo modo cum omnes aque et herbe terre nostre de iure et recto dominio ad nostram pertineat potestatem, auctoritate presentium, sub pena rerum et personarum, vobis firmiter et districte dicimus et mandamus quatenus, visis literis, de cetero nullos habeatis seu faciatis vetatos in dictis terminis neque villis in quantum fuerit de Epila usque ad Alcanicium circumquaque.

Mandantes firmiter quod totum bestiarium Cesarauguste et aliorum hominum terre posset pascere et habere ibi herbae et aquas sine omni impedimento et sua necesaria consueta.

Mandamus ultimo quod si quis vestrum temptaret huic mandato nostro in aliquo contravenire vel renuerent vetatos istos quos revocamus, quod merinus et zalmedina et iurati Cesarauguste pignorent et distringant illos in rebus et in personis qui in aliquo venerint contra ista vel fecerint ullum impedimentum.

Datum apud Cesaraugustam, Vª kalendas februarii era Mª CCª LXXª Iª.