Logo UJI
ARXIU VIRTUAL JAUME I
Documents d'època medieval relatius a la Corona d'Aragó
1254, agost 30. Zaragoza
Jaume I demana permís als consells municipals d'Aragó per poder encunyar moneda jaquesa per valor de quinze mil marcs d'argent, per tal de sufragar la guerra amb Castella, declarant que això no creara cap perjudici als anteriors privilegis concedits relatiu a la moneda jaquesa en circulació
Arxiu Municipal de Zaragoza. Pergamins. R-21. Original
Transcripció amb variants formals efectuada a partir de l'edició de Mª de los Desamparados Cabanes Pecourt: Documentos de Jaime I relacionados con Aragón. Institución Fernando el Católico. Zaragoza 2009, document 86

Noverint universi quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, recognoscimus et confitemur quod propter guerram quam habemus et speramus habere in isto festo proximo sancti Michaelis et deinde cum treuge inter nos et illustrem regem Castelle posite non se extendant ultra dictum festum sancti Michaelis, quam quidem guerram dictus rex Castelle nobis movet in magnam et gravem oppressionem persone nostre et totius regni nostri, vos concilium Cesarauguste, Osce, Iacce, Tirasone, Calataiubi, Daroce, Turolii et Barbastri et universitas conciliorum regni Aragonum facitis nobis gratiam specialem in tanta neccessitate, videlicet quod concedatis nobis quod nos faciamus cudi istam monetam iaccensem usque ad quindecim milia marcharum argenti in auxilium dicte guerre.
Et nos, predictus rex, propter istam graciam quam nobis facitis, volumus et concedimus quod non preiudicetur propter hoc in aliquo priori instrumento monete inter nos et vos facto apud Monsonem in curia generali.
Immo volumus et concedimus quod dictum instrumentum remaneat in ea firmitate, robore et valore et securitate in perpetuum in qua erat ante istam concessionem nobis factam. Promittimus igitur pro nobis heredibus et successoribus nostris vobis, dictis conciliis, bona fide et legalitate nostra, in ea videlicet legalitate qua dominus tenetur vassallis fidelibus quod unquam contra primum instrumentum monete a nobis vel heredibus et successoribus nostris nichil penitus attemptetur; nec valeat destrui dictam monetam vel mutare aut de novo a modo cudi, minui vel augeri a nobis nec heredibus vel successoribus nostris; nec permitamus nos nec heredes nostri quod contra predicta aliquo tempore aliquid attemptetur.
Ad cuius rei perpetuam firmitatem nos Iacobus, Dei gratia rex predictus, tactis sacrosanctis evangeliis et cruce Domini coram nobis posita personaliter, pro nobis heredibus et successoribus nostris iuramus omnia predicta et singula fideliter in omnibus adimplere, servare et in nullo contravenire.
Preterea volumus et consentimus, renunciantes specialiter privilegiis et indulgenciis Romanorum Pontificum nobis concessis, quod episcopus cesaraugustanus qui presens est, ferat sententiam excomunicationis in nos et successores nostros si aliquo tempore a nobis vel ab ipsis successoribus contra premissa aliquid fuerit attemptatum.
Et nos A., Dei gracia cesaraugustanus episcopus, de consensu et voluntate domini regis predicti, excomunicamus in scriptis dominum Iacobum regem Aragonum predictum et eius heredes et successores si contra premissa ab ipso heredibus vel successoribus suis aliquid fuerit attemptatum. Ceterum nos, Iacobus, Dei gracia rex Aragonum predictus, propter graciam predicta nobis factam a conciliis supradictis, remitimus et dimitimus omnino universo populo terre nostre monetaticum proximum futurum quod in festo proximo septennio nobis dare debebant, secundum primum instrumentum monete apud Monsonem confectum in curia generali.
Interfuerunt huic negotio ex parte Cesarauguste iurati eiusdem ville, videlicet Stephanus Egidii Tarini, P. Vigoros, P. Eximini de Tarba, P. de Calataiub, I. Iter, D. de Tarba, I. de Avinyon, P. de Ladron, Teren d’Aychen, P. Cornelii et D. de Aliafaria; et de civibus eiusdem civitatis interfuerunt M. Egidii Tarin, I. Egidii Tarin, R. Bernardi, P. de Oscha, P. Balduvini zavalmedina, Balduvinus, P. de Calzada, P. de Ferriz et multi alii.
Pro civitate oscense fuerunt, P. Bonanat, S. de Salin, G. Guayllardus et Iohannis Don Iulian.
De Iacca, Simon de Saules, P. de Fontanes, G. de Saules et Iohannis Dompni Dominici.
De Barbastro, I. Niger, Berenguer Rubeus, D. de Cesaraugusta iustitia, I. de Maysen, P. Gemenino, R. Dominici Sanctii, I. de Piynana.
De Tirasona, G. Petri Suero, P. Cipriani, I. de Sos, G. filius dompni Vincentii, D. de Almenar, D. Adrian et G. Petri campsor.
De Calataiub, Sorianus iudez, Andreas de Liynan, Exemen de Sayas, F. de Sayas, G. de Sayas, M. Moynoz, I. Mercator et R. Grimaldi, I. del Figer, Adam de Morlans et Bartholomeus Arnaldin.
De Daroca, Berenguer de Berbegal, Egidius de Petro Iohan, M. Petri de Sanctio Aznarez, I. Dominico de Mengo Mengez et S. de Luzes Carnes.
De Turolio, Egidius Sanctii iusticia, M. Petri iuratus et Iohan Scriba.
Datum Cesarauguste, IIIº kalendas septembris anno Domini Mº. CCº. Lº. quarto.
Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.
Testes sunt: Episcopus cesaraugustanus. Frater Andreas episcopus Valencie. Alvarus Petri. P. Cornelii. Exemen Petri de Arenoso. Bertrandus de Ahones. M. Petri iusticia Aragonum. B. de Fontova prior Sancte Marie Cesarauguste.
Sig+num Iacobi de Monteiudaico, qui mandato domini regis pro domno fratre Andrea episcopo Valencie, cancellario suo, hoc scripsit loco, die et anno prefixis.

Universitat Jaume I. Castelló. Arxiu Virtual Jaume I - http://www.jaumeprimer.uji.es - Document nº 001479

© 2006 - Universitat Jaume I - Arxiu virtual Jaume I