Noverint universi quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros convenimus et promitimus bona fide vobis, universis hominibus de Fraga, presentibus et futuris, quod non donemus, vendamus, impignoremus seu alio quolibet modo alienemus aliquibus personis secularibus vel religiosis potestatem, propietatem, feudum seu alia iura que penes nos et dominium nostrum retinuimus in villa de Fraga in vendicione, alienacione seu concambio quod cum nobili viro G. de Montecatano fecimus de dicta villa pro feudo quod habebat in civitate Ilerde, sed ipsam potestatem, proprietatem, feudum et omnia alia iura ad dominium nostrum et heredum meorum comitum Barchinone perpetuo retinemus.

Convenimus eciam et promitimus vobis quod faciemus observari inviolabiliter ab ipso G. de Montecatano et heredibus suis omnes donaciones, privilegia seu instrumenta que a nobis et ab antecessoribus nostris habetis et omnes eciam foros et bonas consuetudines quas habetis vel ullo modo consuevistis.

Datum Cesarauguste, VI idus octobris anno Domini Mº. CCº. Lº. quinto.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: B. G. de Entença. Pelegrinus de Atrossillo. G. de Podio. Eximinus Petri de Arenoso.

Sig+num Iacobi de Monteiudayco, qui mandato domini regis pro domino fratre A. episcopo valentino et cancellario suo, hoc scripsit loco, die et anno prefixis.