Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros statuimus et concedimus vobis, fidelibus nostris universis et singulis civibus et habitatoribus civitatis oscensis, presentibus scilicet et futuris imperpetuum, quod persona vel persone vestre vel alicuius habitatoris civitatis oscensis predicte non ponatur in capcione nec detineantur dum donetis, secundum forum Aragonum, fidanciam de directo racione alicuius querimonie vel criminis seu delicti aliquo modo, nisi in tribus casibus tantum, videlicet, si latro vel manifestis proditor et homicida fuerit in ipso homicidii casu, foro Aragonie observato.

Mandantes iusticiis, baiulis, çavalmedinis, merinis et omnibus aliis oficialibus et subditis nostris ibidem constitutis et constituendis, quod contra predicta in aliquo non veniant seu venire presumant tempore aliquo ullo modo ymmo observent et faciant imperpetuum observari.

Datum Exee, tercio nonas decembris anno Domini millesimo CCº. LXº. tercio.

Signum + Iacobi, Dei gratia regis Aragonie, Maioricarum et Valencie, comitis Barchinone et Urgelli et domini Montispesulani.

Testes sunt: Bernardus Guillelmi de Entença, maiordomus Aragonum. Garsias Romei. Berenguer de Entiença. Bernardus de Mallaleone. Hugonis de Cervilione.

Sig+num Michaelis Violeta, qui de mandato domini regis hec scribi fecit loco, die et anno prefixis.