[Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani], per nos et nostros concedimus vobis, concilio Sarrionis, presenti scilicet et futuris, quod possitis construere et facere molendinum in quocumque loco vel locis rivi de Babor, termini Sarrionis, ubi vobis melius videbitur expedire, dum tamen ipsum faciatis sine preiudicio alterius; quod molendinum quod ibi feceritis, ut dictum est, habeatis vos et vestri successores francho et libere ad usus vestros seu habitatorum omnium Sarrionis et in eo positis molere vestrum panem libere et sine impedimento alicuius persone.

Mandantes firmiter baiulis, iusticiis et universis aliis oficialibus et subditis nostris, presentibus et futuris, quod predicta firma habeant et observent ac faciant observari.

Datum Valencie, XVIº kalendas madii anno Domini Mº. CCº. LXº. octavo.