Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros damus et concedimus vobis, venerabilibus et dilectis fratri P., abbati, et conventui monasterii de Petra, cisterciensis ordinis, et vestris successoribus imperpetuum, quod possitis ab hominibus nostri servicii emere libere et sine contradictu alicuius persone, in terminis Calataiubi, Daroce seu Turolii et aldearum suarum, tot hereditates et pro eodem precio quot hominibus nostri servicii vendetis ex illis quas hodie habetis et in posterum habebitis per alodium franchum.

Ita scilicet quod illas hereditates quas, ut dictum est, ab hominibus nostri servicii emetis, vos seu vestri successores, in terminis antedictis, habeatis vos et vestri successores ac dictum monasterium imperpetuum franchas et liberas ab omni regali exaccione et servitute, secundum quod illas habetis et habebitis, quas hominibus nostri servicii vendetis ut dictum est; pro ut hoc scilicet melius et utilius dici, scribi et intelligi vel excogitari potest ad vestrum et dicti monasterii bonum et sincerum intellectum.

Mandantes firmiter baiulis, iusticiis, alcaydis, merinis et universis aliis officialibus et subditis nostris, presentibus et futuris, quod predicta firma habeant et observent ac faciant observari, ut superius continetur, et non contraveniant nec aliquem contravenire permittant aliqua racione.

Datum Osce, VIº kalendas iunii anno Domini Mº. CCº. LXº. octavo.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Eximinus de Urrea. Atho de Focibus. Blascho de Alagone. Iacobus de Cervaria. Atho de Lesun.