Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani.

Fidelibus suis universis hominibus habitantibus hereditates aut possessiones in villis seu locis monasterii Sancte Marie de Berola, presentibus et futuris. Salutem et graciam.

Noveritis quod nolumus ut de cetero, visis lineis istis, vendatis nec sitis ausi vendere vel modo aliquo alienare aliquibus militibus sive infançonibus vel aliis hominibus possessiones sive hereditates aliquas de illis quas habetis modo vel de cetero habebitis in villis seu locis aut terminis dominii monasterii de Berola sine fatica abbatis vel prioris seu conventus monasterii antedicti.

Quoniam nos volumus quod si dictus abbas, prior ac monachi volunt ipsas possessiones aut hereditates habere et retinere pro tanto pretio pro quanto milites vel infançones seu alii voluerint dare in ipsis, quod possint ipsas habere et penes se retinere pro ipso eodem precio et recepta sit ab eis dicta fatica.

Si ipsi dictas hereditates retinere noluerint, possitis ex tunc vendere ipsas cui volueritis sine aliquo impedimento tamen cum suo honere servitutis et aliter non.

Quare vobis dicimus firmiter et mandamus quot dictas hereditates vel possessiones vestras vel aliquid ipsarum, de cetero alicui vel aliquibus non vendatis vel alienetis modo aliquo nisi ut superius est dictum.

Et hoc aliquo non mutetis alias sciatis quod nobis displiceret.

Et insuper venditionem quam de ipsis feceritis revocabimus et revocari incontinenti penitus faciemus.

Datum Cesarauguste, VIIº kalendas novembris, anno Domini Mº CCº LXXº primo.