Noverint universi quod venerabilis frater Roderico Petri Poncii, comendator de Alcanicio, ordinis Calatrave, comparuit coram nobis, Iacobo, Dei gratia rege Aragonum, et cetera, et hostendit nobis quoddam instrumentum, quo continetur quedam sentencia prima facie videbatur, quod dicebat esse sentenciam latam per nos in causa que vertebatur inter fratrem Iohannem Petri de Canena, commendatorem de Alcanicio, ordinis antedicti, ex una parte, et homines de Alcannicio ex altera; in qua continebatur quod commendator de Alcannicio posset committere competenti iudici causas que verterentur inter homines de Alcannicio et commendatorem dicti loci, iudici qui sit de Aragonia, qui dictas causas in Alcannicio audiret et eas sine debito terminaret.

Et si appellaretur a sentencia dicti iudicis, quod appellacio fieret ad magistrum ordinis Calatrave; et si a sentencia magistri appellaretur, quod appellacio devolveretur ad nos.

Et sic cum hoc reverteretur in grave preiudicium ordinis antedicti, quod nos de appellacionibus delatis ad dictum magistrum possemus cognoscere, suplicavit nobis humiliter et devote frater Rodericus Petri, commendator predictus, quod iuxta privilegia antecessorum nostrorum dictum gravamen eius illatum revocaremus, quod a sentencia magistri ordinis non possit appellari ad nos.

Et nos, visa iuxta peticionem predictam, forma privilegiorum predecessorum nostrorum et a nobis confirmatorum dictam appelacionem que ad nos debebat fieri, revocamus.

Ita tamen quod commendator dicti loci possit asignare iudicem in causis que vertentur inter homines de Alcanicio et ordinem antedictum; et a sentencia iudicis si fieret appellacio, quod fiat ad comendatorem dicti loci; et si apellaretur a sentencia dicti comendatoris, quod dicta apellacio fiat ad magistrum ordinis antedicti, qui dictas causas audiat et sine debito terminet; et quod ad nos aliqua apellacio non devolvatur.

Immo iurisdiccionem plenariam in dicto loco dicto comendatori et pro eo ordini predicto concedimus et damus et concessam eius fore iam per predecessores nostros et per nos profitemur, secundum quod in privilegiis ab antecessoribus nostris eisdem concessis continetur.

Retinemus cum si comendator de Alcanicio vel ordo predictus aliter faceret violentiam vel iniuriam manifestatam universitati de Alcanicio, quod dicta universitas de Alcanicio possit habere recursum ad nos, ut super eo recursu faciamus, quod de iure fuerit faciendum.

Datum Valencie, VIIIº kalendas aprilis anno Domini Mº CCº LXXº sexto.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Ugo, comes Ympuriarum. Gaucerandus de Pinos. Berengarius Guillermi de Entença. Geraldus de Capraria. Berengarius de Podio Viridi.

Sig+num Simonis de Sancto Felicio, qui mandato domini regis predicti hec scribi fecit et clausit loco, die et anno prefixis.