Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesullani; per nos et nostros damus et concedimus per hereditatem propriam, francham et liberam vobis, Raymundo de Bochona et Guillermo de Rochaforti et aliis trecentis viris populatoribus, quibus dare et distribuere volueritis ad populandum, et vestris et eorum successoribus, imperpetuum, villam de Onda et villam de Talis cum suis omnibus alcheriis et terminis. Qui termini dividuntur cum termino de Burriana et cum termino de Menchin, et cum serra qui dividit cum Artana, et cum termino de Eslida, et cum termino de Çuhera, et cum termino de Vallis de Enveyo, et cum termino castri de Fançara. Et cum termino de Burriol et cum termino de Almaçora, et cum termino de Burriana.

Quas villas et loca et terminos, prout predictis affrontacionibus includuntur, cum domibus, campis, vineis, ortis ac terris cultis et incultis, heremis et populatis, aquis, erbis, pratis et pascuis, montibus, lignis, silvis et arboribus fructiferis et infructiferis, rivis, piscacionibus et venacionibus, introitibus et exitibus, et suis pertinenciis universis a celo in abissum, habeatis vos et predicti populatores, quos vos in predictis villis populaveritis ad omnes vestras vestrorumque voluntates cui et quibus volueritis perpetuo faciendas. Exceptis militibus et sanctis et personis religiosis.

Et faciemus vobis secundum quod faciemus ad bonum intellectum civibus civitatis Valencie.

Excipimus tamen de hac donacionem carniceriam, balnea, tinturariam, furnos, molendina, forum et operatoria de açoch, que nobis et nostris perpetuo retinemus.

Nos igitur predicti Raymundus de Bochona et Guillermus de Rochaforti, pro nobis et pro predictis populatoribus, iuramus per Deum et eius sancta Evangelia, quod personalem residenciam faciamus in Onda, et omnes possessiones quas alibi habemus vendamus hinc ad unum annum, vel aliter alienemus sine retencione nostra et predictorum. Aliquid non vendamus nec aliter alienemus hinc ad decem annos.

Datum Valencie quarto kalendas madii anno Domini Mº CCº XLº octavo.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et dominus Montispesullani.

Testes sunt Guillermus de Montecatheno, Guillermus de Boxados, Jaufridus de Rochabertino, Guillermus de Angularia, Guillermus de Crexello.

Sig+num Petri Andree qui mandato domini Regis pro Guillermo Scriba, notario suo, hec scripsit loco die et anno prefixis.