Noverint universi quod nos, Jacobus, Dei gratia rex Aragonum et Maioricarum et Valencie, comes Barchinone et Urgelli et dominus Montispesulani; per nos et nostros successores damus, concedimus vobis, Offredo Ros de Urssinis de Campo Floris, militi et de nobilissimo genere romanorum sancte urbis Rome, et tribus fratribus vestris, et sexaginta sociis equitibus vestris, qui fuistis in servicio Dei omnipotentis et beate Marie carissime domine nostre et nostri, tunc in conquesta regni et civitatis Maiorice, et nunc in conquesta regni et civitatis Valencie, continue, sex vicos cum sexaginta quatuor hospicia notabilia et multa alia minuta, intus civitatem Valencie predicte, confrontatur cum barrio de Album Calbo, et cum barrio de Jayceradi, et cum barrio de Algalgra, et cum barrio de Alhadram, et cum barrio hominum de Ilerda, et cum barrio hominum Barchinone, et cum murum civitatis; ad habendum, tenendum, possidendum, explectendum, cum introitibus et exitibus et affrontacionibus et suis pertinenciis universis ut franchum alodium vestrum et libero, a celo in abissum, ad dandum, vendendum, alienandum, impignorandum, et ad dividendum cum fratribus vestris et sociis sexaginta, sicut volueritis perpetuo faciendas.

Datum Valencie quarto nonas madii era Mª CCª LXXª VIIª.

Sig+num Jacobi Dei gratia regis Aragonum, Maioricarum, Valencie, comitis Barchinone et Hurgelli et dominus Montispesulani.

Huius rei testes sunt: Petrus Fernandez de Açagra, Eximinus de Urrea, Guillermus de Aguilone, Arnaldus de Agudell, Fernandi Petri de Pina.

Sig+num Guillermi Scribe, qui mandato domini Regis, pro domino Berengario, barchinonense episcopo cancellario suo, hec scribi fecit loco die et era prefixis.

Et lecto fuit domino Regi.