Petrus, Dei gratia rex Aragonum, comes Barchinone et dominus Montispesulani.

Dilectis et fidelibus suis tam maioribus quam minoribus universi concilii Cesarauguste. Salutem et sue gratie plenitudinem.

Cum non nobis quid liceat, sed quid deceat inspicere teneamur, mentemque nostra domare debeat semper, et freno consilii retinere respectus honesti, ut sic sciamus prout decrevit parcere subiectis, et debellare superbos; idcirco corde bono et animo volenti, vobis universis et singulis, pure et perfecte et sine omni retentu in perpetuum condonamus et ex toto remittimus, quicquid ire, odii, indignationis, ranchoris et simultatis, contra vos et universitatem vestram concepisse hactenus potueramus, vel habere aliquo modo debebamus, ob querimonias illas quas contra vos aliquatenus habebamus.

Unde hanc condonationem et remissionem vobis omnibus perpetuo facientes, vos omnes tam maiores quam minores, in nostram plenam et perfectam et veram ac sinceram dilectionem et amoris et gratie plenitudinem reducimus, et semper in ea habere vos volumus et tenere, tanquam illos quos pre cunctis aliis terre nostre diligere proponimus, et honorare, et caros et amicos habere sicut bonos et fideles homines nostros et vassallos.

Hec autem omnia vobis promittimus firmiter observare, de his complendis et perfectius observandis, vos omnes recipientes sub fide et anima nostra.

Mandamus igitur et monemus attentius, quatenus utilitati nostre, et tocius terre nostre deffensioni, potenter et fideliter intendatis, ita quod in conspectu nostro et omnium qui viderint et audierint, laudem et gratiam ampliorem debeatis merito invenire.

Data Ylerde per manum Ferrarii, notarii domni regis, secunda dominica mensis maii sub Era Mª CCª XLIIIIª.

Sig+num Petri, Dei gratia regis Aragonum, comitis Barchinone et domini Montispesulani.

Huius rei testes sunt: [1ªcol.] Examenus de Lavata prior domus sancti Egidii, Poncius meneschalci comandator Montisoni, Petrus Ferrandi maiordomus, Garsia Romei senior in Cesaraugusta, Guillermus de Cervaria, Petrus Goterriz, Garsia Goterriz, Aprilis Garsie, Alfonssius Albariz, [2ª col.] Artaldus de Alagone, Michael de Lusia, Azenarius Pardi, Petrus de Alchalano, Guillermus de Alchalano, Martinus de Caneto, Raimundus de Montecatano, Mathalao, Guillermus de Crexello, Arnaldus de Fuxano, [3ª col.] Adam de Alascone, Arnaldus de Alascone, Gasia Ortiz, Athorela, Raimundus de Castro Veteri, Poncius de Castilione, Sancius de Antilone, Bernardus de Benavent, Petrus maiordomus.

Ego Ferrarius, notarius domini regis, hoc scribi feci mandato ipsius, sub testimonio prescriptorum, loco, die, et era prefixis.