Noverint universi, quod nos Iacobus Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et nostros concedimus et indulgemus vobis, universis hominibus Iacce presentibus et futuris, in perpetuum, quod possitis tingere et tingi facere in vestris domibus et in caldaria sive tintorie nostra de Iacca, omnes colores et singulos, sicut cives et homines Ilerde et Osce tingunt et tingi faciunt in suis domibus et in caldariis et tinturariis nostris in dictis civitatibus constitutis.

Data Valentie IIIº kalendas aprilis anno Domini Mº CCº XLº nono.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Huius rey testes sunt, Iatbertus de Castro Novo, G. de Aquilone, Carroci, G. de Crudiliis, Egidius de Atrossillo.

Sig+num Petri Andree, qui mandato domini regis pro G. scriba, notario suo, hoc scripsit loco die et anno prefixis.