Manifestum sit cunctis quod nos Nuno Sancii Dei gratia dominus Rossilionis, Vallis Aspiree, Ceritanie et Confluentis, considerantes et aperte cognoscentes quod loca herema non possunt habitari neque popular, nisi a principibus terre populatoribus et habitatoribus dentur bona fora, consuetudienes et franquitates, idcirco, sperantes quod in podio illo de Bello Videre, quod situm est in partibus de Baridano in adiacentia beate Marie de Tollone, bona fiet populatio et multi ibi de longinquis partibus, ad utilitatem nostri et totius terre, venient habitare; bono animo et spontenea voluntate, cum hac presenti carta firmiter in perpetuum atque irrevocabiliter valitura per nos et per omnes successores nostros, donamus atque concedimus vobis omnibus populatoribus et habitatoribus in dicto podio de Bello Videre, presentibus et futuris, ut vos et omnis generatiio et posteritas vestra et filii sitis franchi liberi penitus et inmunes cum omnibus vestris rebus, ubicumque per terram nostram habieritis, ut nobis nec alicui pro nobis nec ulli alii homini vel femine non faciatis nec respondeatis de ullo servitio vel censu, nec de ulla alia re quam ullus homo vel femina debeat facere dominio suo; nec de intestacione vel de exorquia respondeatis, nec sitis sub potestate alicuius hominis vel femine.

Donamus etiam vobis et concedimus inperpetuum ut habeatis et accipiatis per omnia loca ubique ligna et aquas et pascua, et possitis habere alia omnia que vobis necessaria fuerint, et montaneas et alia omnia que ad usum et servitium hominis pertinere debent et sunt necessaria, ad vestram propriam voluntatem.

Concedimus etiam vobis ut nullus qui inter vos non sit populator et habitator, sit aliquo modo ausus ibi vendere per tall nec tenere tabulam.

Concedimus preterea vobis et vestris in perpetuum ut in unaquaque ebdomeda faciatis mercatum in die martis, et faciatis annuatim in festo Pentecosten firam per diez XV duraturam.

Concedimus etiam volumus et statuimus, quod si aliquis alicui vestrum iniuste et sine ratione malum facere temptaverit, possitis illum malefactorem distringere sine asensu nostri baiuli, donec malefacta plenarie et integre vobis restituat, et propter hoc noster baiulus vos non possit vocare nec distringere.

Preterea concedimus et statuimus quod omnis populator et habitator in dicto podio habens valentem mille solidos inter mobile et inmobile, credatur per sacramentum de placito centum solidorum, sine alio iudicio et absque prelio.

Concedimus etiam vois et donamus quod per totam terram nostram non donetis leudam neque pedaticum nec ullum usaticum de ulla re vestra nobis nec ulli alii homini nostro.

Insuper recipimus vos et omnes res vestras mobiles et inmobiles et se moventes habitas et habendas, et nominatim omnes illos qui ad dictum mercatum venerint et firam cum omnibus rebus suis, in nostra speciali defensione, custodia et securo ducatu; ita quod nullus sit ausus vobis nec illis nec rebus vestris dampnum aliquod vel iacturam inferre nec alicubi detinere nec impediré in aliquo loco terre nostre. Supradictam autem franquitatem et donum per nos et per nostros facimus vobis et vestris et omni generationi et posteritati vestre in perpetuum, sicut melius dici et intelligi potest ad vestram vestrorumque utilitatem et voluntatem.

Tamen retinemus nobis et nostris per omnia loca in perpetuum omnes iustitias, hostes et chavalgatas, quandocumque vel quotienscumque per nos vel per literas aud nuntios nostros eas vobis facere mandaverimus, et census consuetos quos nostris antecessoribus antiquitus dare et facere estis consueti.

Et retinemus etiam nobis et nostris in dicto Podio et villa et eius terminis furnos et molendinos, ita quod nullus vestrum presens vel futurus sit ausus in dicto Podio et villa nec eius terminis furnum nec molendinum aliquem facere nec lenam aut aliud machinamentum, ut non minus possint valere redditus nostrorum furnorum et molendinorum.

Mandamus igitur omnibus vicariis et baiulis nostris per totam terram nostram constitutis et constituendis ut hanc nostre auctoritatis paginam ratam es stabilem teneant et observari faciant inconcusse.

Quicumque autem contra hanc cartam nostram ausu temerario in aliquo venire temptaverit, iram nostram incurret et penam mille aureorum a nobis sine aliquo remedio ferietur.

Data apud Podium Cerdanum, VI Kalendas ianuarii per manum Bernardi de Prignano, notarii nostri, mandato nostro et ipsius scripta ab Olivario, anno Domini MCCXXV in presentia Guillelmi de Anyort, F. de Narvaitz, Guillelmi de Portella, Arnaldi de Ponte, Raimundi de Traveseriis, Raimundi de Salcs, Petri Xaverre, Bernardi Guillelmi de Villafrancha, baiuli, Petri Sifredi, Petri de Garrigis, Petri de Garriga, Raimundi Chatelly, Guillemi de Mornacho, D. Hungria, Bernardi Balistarii, Petri de Sureda et aliorum multorum.

Signum Nunonis Sancii.

Signum + Bernardi de Prignano, domini Nunonis notarii qui, mandato eius, hanc cartam scribi et sigillum apponi feci loco, die et anno prefixis, literis in VIII línea suprascribtis.

Signum + Oliverii qui mandato domini Nunonis et vice Bernardi de Prignano, notarii eius, hanc cartam scripsi.