Manifestum sit omnibus presentibus et futuris, quod ego Petrus Dei gratia rex Aragonum et comes Barchinone, laudo et concedo et confirmo, et cum hac presenti carta perpetuo valitura liberaliter auctoritzo vobis, omnibus hominibus tam maioribus quam minoribus habitantibus et habitaturis in Perpinyano, omnes illas bonas consuetudines quas pater meus bone memorie dominus Ildeffonsus illustris rex vobis quondam dedit, laudavit, concessit et confirmavit, sicut melius et sincerius continetur in instrumento ab eo ipso vobis inde facto.

Preterea volo et mando et pagine presentis auctoritate firmissime constituo, quod omnis persona sive sit miles sive clericus, sive sit religiosa vel alius cuiuslibet conditionis et professionis, qui aliquid habeat et possideat in villa Perpinyani vel in terminis suis, [38v] det et mitat in expensis et missionibus operi muri ville Perpinyani vicinaliter secundum quod habuerit.

Mando etiam et firmiter precipio baiulo quicumque sit Perpinyani, presenti vel in posterum substituendo, quod hoc mandatum meum firmiter compleat et conservet, et quandocumque et ubicumque necesse fuerit potencialiter distringat.

Promitto insuper et convenio vobis omnibus supradictis presentibus et futuris, quod nullum militem, nec aliquam aliam personam neque res eius cui aliquid contingat vel contingerit vos credidisse, vel que vobis in aliquo teneatur debito, in meo recipiam guidatico vel in aliqua mea assecuracione, neque aliquam elongationem debiti vobis fieri faciam, scripto vel mandamento, et quod nulla carta impetrata a me vel impetranda possit vobis aut vestris aliquatenus nocere super predictis mandamentis, et pro missionibus constitutis, nisi esset pro mei proprii exercitus necessitate.

Datum Perpinyani, XIIIª kalendas octobris anno Domini millesimo CCº VIIº, per manum Petri de Blandis, notarii domini regis.

Signum + Petri, Dei gracia regis Aragonum et comitis Barchinone.

Testes huius rei sunt: Raymundus comes Foxensis, Garcia Romei, Petrus Gotertitz, Artaldus de Alagone, Guillermus de Castro Novo, Pontius de Verneto, Guillermus Durfortis, Guillermus de Alcalano, Guillermus de Podio, Martinus de Caneto, Hugo de Turre Rubea, Blasco Romei, Guillermus de Caneto, Guillermus de Monte Squivo, Raymundus Repre, Guillermus episcopus Vicensis, Guillermus episcopus Elnensis, Petrus abbas Santi Iohannis, Petrus sacrista Vicensis, Berengarius archidiaconus Barchinone, Guillermus Iordani archidiachonus Elnensis, Bernardus Amelii, Martinus Repre. Et de probis hominibus Perpinyani, Petrus Pauci, Guillermus Adalberti, Guillermus Gallardi, Stephanus de Villarasa, Guillermus Bernardi, Iohannes Andree, Ermengaudus Gros, Perpinyanus Gras, Raymundus Sach, multique alii.

Sig+num Petri de Blandis, notarii domini regis, qui mandato eius scribi fecit supradicta, cum litteris supra positis in linea IIIª et in XIª, loco die et anno quibus supra.