Noverint universi, quod nos Iacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesullani, per nos et nostros damus et concedimus perpetuo omnibus habitatoribus presentibus et futuris ville Perpinyani, quod nullus predictorum pro aliqua causa vel placito ullo modo eximatur de curia baiuli ville Perpinyani, et quod nullus predictorum teneatur ad aliquos sumptus dandos aliquibus iudicibus terre nostre Rossilionis, quandocumque pro aliqua causa aut placito placitaverit coram eis.

Alioquin omnes homines quorum domini hoc sustinere noluerint, teneantur dare sumptus iudicibus in curia nostra Perpinyani, cum ibi placitaverint quoquomodo.

Mandantes vicariis, baiulis, et universis aliis subditis nostris presentibus et futuris, quatinus predicta faciant inviolabiliter observari, et contra ea non veniant nec aliquem venire permittant.

Datum Calataiubi, XIIIª kalendas decembris anno Domini millesimo CCº XLº IXº.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesullani.

Testes sunt: Guillermus de Entença, Eximinus de Focibus, Guillermus de Buçadors, Guillermus de Crexello, Eximinus Petri de Arenoso.

Sig+num Petri Andree, qui mandato domini regis pro Guillermo de Bello Loco, notario suo, hoc scripsit die et anno prefixis.