Noverint universi quod cum nobis Alfonso Dei gracia regi Aragonum, Maioricarum et Valencie, ac comiti Barchinone extiterit significatum quod quidam de Cathalonia presumpserunt extorquere in aliquibus locis Cathalonie sub pretextu nauffragii quasdam res que de quibusdam barchis et lignis periclitatis fuerant salve facte, et hoc sit contra ius et iusticiam; idcirco constituimus et ordinamus ex certa sciencia quod de cetero in tota Cathalonia non audeat aliquis cuiuscunque condicionis existat capere vel usurpare aut etiam detinere alias res nomine nauffragii vel etiam roobadine que fuerint de aliquibus navibus, lignis, barchis vel aliis vasis periclitatis aut periclitantibus.

Mandantes vicariis baiulis et aliis officialibus et subditis nostris Cathalonie presentibus et futuris, qod hanc nostram ordinationem et mandatum observent et ab omnibus inviolabiliter faciant observari. Et si forte invenerint aliquos qui contra predictam ordinationem et mandatum nostrum venire presumpserint, volumus et mandamus eis quod ab ipsis pena legitima sine omni remedio puniantur.

Datum Barchinone quarto kalendas aprilis, anno Domini millesimo ducentesimo octuagesimo sexto.

Signum + Alfonsi, Dei gracia regis Aragonum, Maioricarum et Valencie ac comitis Barchinone. Testes sunt, Arnaldus Rogerii comes Palariensis, Guillermus de Anglaria, Berengarius de Podio Viridi, Raymundus de Montecateno, Luppus Ferrandi de Luna.

+ Petri Marchesii, notarii dicti domini regis qui mandato eiusdem hec scribi fecit et clausit loco die et anno preffixis.