Sancius, Dei gratia rex Maioricarum, comes Rossilionis et Ceritanie, et dominus Montispesullani. Notum facimus universis, quod consules et probi homines ville Perpinyani exhibuerunt nobis quoddam statutum seu ordinacionem factam olim per probos homines dicte ville Perpinyani continentem, quod cum aliquis electus fuit ad talliandam questiam aliquam vel collectam publicam in villa Perpinyani, non possit aliquid retinere vel recipere aut petere vel habere, pro labore suo, quandocumque et quocienscunque fuerit electus ad talliandum questiam seu colectam, ymo gratis et sine aliqua remuneratione seu salario teneatur facere fideliter et diligenter ordinare, et talliare talliam seu collectam ad quam fuerit electus.

Sed collectiores seu exactiores huiusmodi questiarum seu collectarum, pro exhigendis et colligendis dictis talliis seu collectis, habeant inde salarium sive remunerationem congruentem pro labore suo, cognitione et arbitrio illorum qui talliaverint et ordinaverint ipsas tallias sive collectas.

Quo statuto seu constitutione nobis exhibita, consules et probi homines Perpinyani supplicaverunt nobis suppliciter, ut constitutionem ipsam [43v] confirmare et rattifficare dignaremur.

Nos igitur, volentes iustis supplicationibus subditorum nostrorum favorabilem prebere assensum, ex certa sciencia per nos et nostros statu[tu]m seu constitutionem predictam ratifficamus, approbamus, et corroboramus, et volumus teneri et firmiter observari perpetuo in villa Perpinyani.

Mandantes locum nostrum tenentibus, vicariis, et baiulis presentibus et futuris, quod predicta omnia firma habeant et observent, et faciant ab omnibus firmiter teneri et observari.

Et hoc mandatum etiam facimus omnibus aliis officialibus nostris, tam presentibus quam futuris.

In cuius rei testimonium et fidem presenti carte nostrum iussimus appendi sigillum.

Quod est actum Perpinyani, septimo kalendas aprilis anno Domini millesimo trecentesimo septimo decimo.

Ego Laurencius Plaisença, scriptor preffati domini nostri regis, ipsius mandato hanc cartam scribi feci et clausi meo publico sig+no.