Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros remittimus et in perpetuum absolvimus omnino novum herbaticum quod regno Aragonum imposueramus, videlicet quod de qualibet ove sive capra, ariete sive irco, unus denarius; et de qualibet bove, vacha vel equa quatuor denariis nobis annuatim darentur.

Redentes et concedentes esse paccatos et contentos illo herbatico antiquo quod nos et antecessores nostros consuevimus in Aragone recipere et habere.

Remitimus etiam et absolvimus in perpetuum mandatum quod fecerimus, quod de sale nostro omnes homines de regno nostro Aragonum uterentur seu emerent certam quantitatem de ipso.

Volentes et perpetuo concedentes quod aliquis homo Aragonum non teneatur de cetero emere per unus certam quantitatem de dicto sale nostro, nec uti de ipso nisi velit; sed nichilominus prohibendo mandamus quod nullus homo de regno Aragonum sit ausus de cetero ponere vel uti in toto regno Aragonum de sale Castelle vel Navarre nec etiam de aliquo alio loco extra regnum nostrum predictum. Quod qui fecerit, in posse nostro sit incursus cum persona et omnibus bonis suis.

Datum Calataiubi, XVIIº kalendas februarii anno Domini Mº. CCº. LXº. quarto.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: P. de Montechateno. Garsias Ortiç de Açagra. Huguetus de Cervilione. M. Petri, iusticia Aragonum. A. de Verneto.

Sig+num Michaelis Violete, qui mandato domini regis hec scribi fecit loco, die et anno prefixis.