Manifestum sit cunctis quod ego Petrus, Dei gratia rex Aragonum et comes Barchinone, dono, laudo, et concedo tibi Guillelmo de Monte Cathano omnia castella, villas, honores, et possessiones quas pater tuus Guillelmus Raymundi per me habet et tenet, aut aliqui antecessores eius habuerunt et tenuerunt aut habere et tenere debuerunt; videlicet castrum de Monte Cathano, castrum de Todela, castrum de Stella, castrum de Fornols, castrum de Supreporta, castrum de Bosora, castrum de Coruyl, castrum de Corilione, castrum de Medala, castrum de Tona, castrum de Obairano, castrum de Vangricos, castrum de Monte Cadem, castrum de Rappataillada, castrum de Casteilar.

Et si qua alia castra aut villas inventum fuerit ipsos habuisse et tenuisse per antecessores meos.

Huiusmodi, autem donativum facio tibi prefato Guillelmo de Monte Cathano in hunc modum, quod post obitum patris tui Guillelmi Raymundi predicta omnia castella cum villis, honoribus et possessionibus, sicut superius dictum est, habeas, teneas atque possideas per me et meos successores in feudum et ad servitium et fidelitatem meam et meorum, et facias inde mihi et meis hostes, cavalcatas, cortes, placita et sequimenta et cetera servicia sicut antecessores tui nostris antecessoribus facere consueverunt, et sis inde mihi et meis solidus contra omnes homines et feminas.

Ut autem hoc donum firmius sit et magis stabile, te Guillelmum recipio in hominem manibus propriis commendatum.

Datum Montispessulani, per manum Johannis de Birix domini regis notarii et mandato eius scripta a Petro scriptore, sub anno Domini M CC II.

Sig+num Petri regis Aragonum et comitis Barchinone.

Sig+num Alberti de Castro veteri. Sig+num A[rnaldi] de Fuxano. Sig+num Geraldi de Monte Rotundo. Sig+num Guillelmo de Solerio. Sig+num Garcia Rumm[e]i.

Sig+num Petri scriptoris, qui hoc scripsit mandato domini regis.